الناس بتسأل ليه مصر أخدت المركز الأخير في سرعة و جودة الإنترنت ما بين كل دول العالم؟
١- ببساطة شديدة لإن الانترنت في مصر يعتبر أسوأ و كمان أغلي خدمة انترنت في العالم كله (بالنسبة للسرعه المقدمة) و بالإضافة إلي خدمة عملاء و عروض قمة في السوء.
٢- الناس في اوروبا و امريكا و الدول المتقدمة بطلوا خلاص يتكلموا في سرعة ميجا او ٢ او حتي ١٠ ميجا بقوا يتكلموا في سرعات ٥٠، ٢٠٠،١٠٠ ،٣٠٠ ميجا و انت طالع فوق!
٣- الحكومات و شركات الانترنت بتهتم في الخارج بإنها توفر اعلي التكنولوجيا اللي بتخلي السرعات انها تبقي مهولة هناك .. الإنترنت خلاص بقي مسيطر علي العالم كله دلوقتي و لو حصل اي عطل فيه في اي بلد .. البلد ديه بتخسر مليارات الدولارات في ثانيتها .. يعني مفيش اقتصاد قوي محترم حيطلع من انترنت بطئ.
٤- شركات الانترنت في مصر بتهتم فقط بسرعة التحميل و بتلاقي انك لو عاوز ترفع صورة بتاخد منك وقت كبير لان سرعة الرفع بتكون اقل من التحميل بكتيرعكس معظم دول العالم اللي بتهتم بالإتنين!
٥- معظم دول العالم بقي عندها انترنت ال 4G علي الموبايل و خلاص حيصدروا قريب ال 5G (اللي حيخلي سرعات النت ١٠٠ ضعف سرعات ال 4G الحالية) و احنا بنحمد ربنا لو لقطنا ال 3G اللي صدر سنة ١٩٩٨ !
٦- معظم دول العالم بقت كل خطوطها فايبر و احنا لسة بنستخدم سلوك متهالكة متكعبلة كلها في بعض.
٧- معظم دول العالم لغت سياسة الاستخدام العادل او حتي لو بيطبقوها بتكون مساحة الدانلود كبيرة جداً و غالبية الناس مش بتخلصها بالرغم من التحميل الكبير بسبب السرعة العالية!
٨- الانترنت قدر يوصل ل ٥٠ مليون شخص في ٤ سنين فقط في حين ان التليفيزيون وصل للعدد نفسه في ١٣ سنه و الراديو وصل برضه للعدد نفسه في ٣٨ سنه!
٩- حوالي ٢٥ بليون ايميل ( ٢٥٠٠٠ مليون) بيتبعت يومياً بيقوم عليهم صفقات بمئات المليارات .. ده غير ان في الثانية الواحدة بس في الفيسبوك بيتكتب ٨٥٠٠ كومنت و بيتكتب ٥٤ الف منشور جديد و بيترفع ٣١ ألف صورة جديدة و في الثانية الواحدة بس علي الانستجرام بتترفع ١١٥٨ صورة و في الثانية الواحدة بس بيحصل ١٤٣٨ مكالمة سكايب جديدة اللي شركات المحمول قافلاه عندنا بدون اي اسباب مقنعة.. و في الثانية الواحدة بس بيتم مشاهدة ٨٥,٥٠٠ فيديو علي اليوتيوب و في الثانية الواحدة بس بيتبعت ٢,٣١٧,٣٤٢ إيميل جديد.
١٠- مفيش دولة في العالم كله بتكلم خدمة عملائها عشان عندك مشكلة في الانترنت كل اللي يقولوهولك انك تقفل الرواتر و تفتحه!
يا تري لسة في ناس بتسأل ليه مصر اخدت التصنيف ده frown رمز تعبيري ؟!
و هل تتوقع ان في مصر قريب يبقي سرعة الانترنت عالية و رخيصة زي باقي الدول ؟!
**ملحوظة : الصورة الأولي لسرعة التحميل في البيت اللي قاعد فيه حجاجوفيتش في النرويج و الصورة الثانية لسرعة ٢ ميجا للانترنت في مصر.
م ن ق و ل